Bakı, 6 may, AZƏRTAC

Mayın 6-da artıq 10 ildən çoxdur Azərbaycanda ənənəvi olaraq hər il keçirilən “İslam Əməkdaşlıq Təşkilatı (İƏT) Modeli - Beynəlxalq Münasibətlər Akademiyası” layihəsinin növbəti mərhələsinə başlanılıb.

Təşkilatdan AZƏRTAC-a bildiriblər ki, İslam Əməkdaşlıq Gənclər Forumunun Bakıda yerləşən Avrasiya Regional Mərkəzinin və Gənclər və İdman Nazirliyinin birgə tərəfdaşlığı ilə həyata keçirilən layihədə iştirak üçün müsahibə əsasında Azərbaycanın bir sıra aparıcı ali məktəblərinin təmsilçiləri və iştirak üçün müraciət etmiş 600-dən artıq tələbə arasından xüsusi istedadı və xarici dil bacarıqları ilə fərqlənən 100-dən çox gənc seçilib. Bu il proqram çərçivəsində tədbirlər “Yaşıl dünya naminə həmrəylik” ideyası altında keçiriləcək. “Yaşıl gələcəyin planının tərtib edilməsi: iqlim dəyişikliyi ilə mübarizədə və qorunmasında İƏT-in rolu” proqramın builki əsas mövzusudur. Eləcə də keçirilən təlimlərdə əsas diqqət COP29 çərçivəsində gənclərin qlobal iqlim problemləri sahəsində maarifləndirilməsinə, onların potensiallarının üzə çıxarılmasına və bu istiqamətdə gənclərin əməkdaşlıq perspektivlərinin öyrənilməsinə yönəlib.

Builki sessiyalarda 10-a yaxın əcnəbi tələbə iştirak hüququ əldə edib. İştirakçıların iki ay ərzində hər həftə baş tutacaq mühazirələrdə və sonda təşkil olunacaq “İƏT Modeli XİN konfransı” simulyasiyasında iştirakı nəzərdə tutulub.

Akademiyanın builki buraxılışının Azərbaycan Dövlət İqtisad Universitetində (ADİU) keçirilmiş açılış mərasimində layihənin koordinatoru Möminə Mehdi “İƏT Modeli” proqramının məqsəd və vəzifələri haqqında, eləcə də bununla bağlı, ötən illər ərzində əldə olunmuş təcrübəni özündə əks etdirən təqdimatla çıxış edib. Daha sonra İslam Əməkdaşlıq Gənclər Forumunun Avrasiya Regional Mərkəzinin (İƏGF-ARM) baş direktoru Rafiq İsmayılov layihənin tərəfdaşı kimi Gənclər və İdman Nazirliyinə, eləcə də tədbirlərə təşkilati dəstək göstərən ADİU rəhbərliyinə Mərkəz adından təşəkkürünü bildirərək, təmsil etdiyi təşkilatın fəaliyyəti haqqında məlumat verib.

İndiyədək keçirilən mühazirələr çərçivəsində Fələstin Dövlətinin Azərbaycandakı səfiri Nasir Əbdül Kərim “Orta Şərqdəki münaqişələrin ətraf mühitə təsiri”, Qazaxıstanın Azərbaycandakı səfiri Alim Bayel “Qazaxıstanın çoxtərəfli diplomatiyası – Şərq və Qərb arasında münasibətləri tənzimləyərək”, elm və təhsil nazirinin müşaviri Nicat Məmmədli “Orta Şərqdə yeni geosiyasi reallıqlar”, Beynəlxalq Münasibətlərin Təhlili Mərkəzinin şöbə müdiri Cavid Vəliyev “Beynəlxalq münasibətlərdə cari vəziyyət: İƏT üzv-dövlətləri arasında strateji münasibətlər” mövzuları üzrə çıxışlar ediblər. Mühazirəçilər tələbələrin müxtəlif suallarını cavablandırıb.

Xatırladaq ki, İƏT Modeli proqramının əsas məqsədləri İƏT məkanında gənclərin beynəlxalq əməkdaşlığının güclənməsinə dəstək vermək, gənclərin və gənclər təşkilatları rəhbərlərinin, üzvlərinin diplomatiya, idarəetmə, kommunikasiya sahəsində yeni bilik və təcrübə qazanmasına yardım etməkdir. İki ay ərzində keçirilən mühazirələrdən sonra tələbələr “İƏT Modeli XİN konfransı” adlanan simulyasiya oyunlarında iştirak edir və münsiflər heyətinin qərarı ilə xarici dil qabiliyyəti, xüsusi yaradıcılıq bacarığı ilə seçilən tələbələr “Beynəlxalq İƏT Modeli” yarışmasında Azərbaycanı təmsil etmək hüququ qazanırlar.

Ötən illər ərzində azərbaycanlı tələbələr dəfələrlə ümum-İƏT miqyasını əhatələyən və İƏT-ə üzv 40-dan artıq ölkə nümayəndəsinin iştirak etdiyi “Beynəlxalq İƏT Modeli” yarışmalarında ölkəmizi layiqli şəkildə təmsil ediblər.