CƏMİYYƏT
Onları birləşdirən dəyər - sənət eşqi, öyrənmək həvəsi və inklüzivlik REPORTAJ
Bakı, 5 aprel, Aytac Haqverdiyeva, AZƏRTAC
DOST İnklüziv İnkişaf və Yaradıcılıq Mərkəzi sosial cəhətdən həssas qrupların yaradıcılıq potensialının aşkara çıxarılması, istedad və bacarıqlarının inkişaf etdirilməsi və onların sosial inteqrasiyasında mühüm rol oynayır. Mərkəzin fəaliyyəti dövründə burada həssas kateqoriyadan olan 480-ə yaxın şəxsə xidmət göstərilib və onlardan 330 nəfərdən çoxu əlilliyi olan şəxslərdir.
Hazırda mərkəzdə 180-dən çox benefisiar təlim keçir. Onlar təlimçilərin rəhbərliyi altında müxtəlif sahələr üzrə sənətin incəliklərini öyrənir, öz əlləri ilə yaratdıqları nümunələri, yaradıcılıq işlərini sərgi və yarmarkalarda nümayiş etdirirlər. Həssas əhali qrupuna daxil olan gənc istedadların əl işləri, bacarıqları beynəlxalq sərgilərdə nümayiş olunur. Bu yaxınlarda onların əl işləri Cənubi Koreyada keçirilən beynəlxalq sərgidə ölkəmizi təmsil edib.
AZƏRTAC-ın əməkdaşları mərkəzdə olarkən benefisiarlarla görüşüb söhbət edib, onların əl işləri ilə tanış olublar.
İlk müsahibimiz Zaqatala rayonundan mərkəzə gələn Nurlan Xəlilli oldu. Nurlan mərkəz haqqında məlumat öyrənəndən sonra 8 ay benefisiarlar sırasına daxil olmaq, təlimlərdə iştirak etmək arzusu ilə yaşayıb. Onun ata-babası rayonda pinəçiliklə məşğul olduğundan Nurlan da ailə ənənəsini davam etdirmək istəyib: “Atamdan həmin sənətin bütün incəliklərini öyrənməyə çalışır, ayaqqabı tikilməsi və təmiri ilə məşğul olurdum. Get-gedə ata-baba sənətinə qəlbən bağlanır və zəhmətimin müqabilində müəyyən qazanc əldə edirdim”.
İndi mərkəzdə toxuma təlimlərində iştirak edən Nurlan bu iki sənət arasında yaxınlıq olduğunu və böyük diqqət tələb etdiyini söyləyir. Görünür, onu toxumanın incəliklərini öyrənməyə sövq edən də iki sənət arasındakı oxşarlıq olub: “Toxuma sənəti çox maraqlıdır və ilk gündən qəlbən ona bağlandım. İlmələri, milçələri əlimə götürərkən rahatlıq tapır və mənən dincəlirəm. İş başında olarkən ətraf aləmlə olan əlaqəmi unudur, öz dünyamda oluram”.
Nurlan mərkəzə gəldiyi gündən həyatının tamamilə dəyişdiyini, onun üçün yeni bir dünyanın açıldığını deyir. Təlim zamanı ona verilən ilk tapşırıq parça üzərində əsgər çəkməsi toxumaq olub. O, bu tapşırığın öhdəsindən çox uğurla gəlib: “İlk işimin uğurlu alınması və təlim rəhbərinin yüksək dəyər verərək bəyənməsi məni çox ruhlandırdı. Açığı, burada hər şey ürəyimcədir və özümü doğma evimizdəki kimi hiss edirəm”.
Tovuz rayonundan olan Səbinə Abbasova isə 9 illik təhsilini bitirəndən sonra DOST İnklüziv İnkişaf və Yaradıcılıq Mərkəzinə müraciət edib. Onun uşaqlıqdan rəssamlığa böyük həvəsi olub: “Demək olar ki, 5 yaşımdan rəsmlər çəkirəm. Atamın da gözəl rəssamlıq qabiliyyəti var. Lap erkən vaxtlarımdan atamın çəkdiyi rəsmlərə diqqətlə baxar və rəsm çəkməyin texnikasını ondan öyrənməyə çalışırdım. Yağlı və akril boyalar vasitəsilə rəsm çəkməyi isə DOST İnklüziv İnkişaf və Yaradıcılıq Mərkəzində öyrənmişəm”.
Gənc benefisiar daha çox təbiət mövzusunda və cizgi filmi qəhrəmanlarını çəkməyi sevir. Səbinə filmdəki obrazları kətan parça üzərində çox asanlıqla işləyə bilir. Mərkəzdə təlim aldığı o qədər də uzun müddət olmasa da, təəssüratı çox yüksəkdir: “Əvvəllər ünsiyyət qurmaqda çətinlik çəkirdim, daha çox özümə qapanırdım. Ancaq burada bizə ana qayğısı, valideyn münasibəti göstərir, böyük qayğı ilə yanaşırlar. Arzum ölkəmizi beynəlxalq platformalarda təmsil etmək, çəkdiyim rəsmlərdən ibarət sərgi açmaqdır”.
Hazırda DOST İnklüziv İnkişaf və Yaradıcılıq Mərkəzinin daxili ekspozisiyasında Səbinənin əsərləri nümayiş olunur.
Digər benefisiar 29 yaşlı Orxan İmanov mərkəzə gəlməzdən əvvəl bədii oyma sənətinə böyük maraq göstərdiyini, eyni zamanda, keramika və dulusçuluqla da məşğul olduğunu bildirir. O, bizimlə söhbət zamanı bədii oyma sənətinə olan sevgisi barədə danışdı: “Hansı sahədə uğur qazanmaq ilk baxışda çətin görünə bilər. Lakin özünə olan inam çox mühüm şərtdir. Bədii oyma sənəti ilə məşğul olmaq sanki mənim potensial və qabiliyyətimi üzə çıxardı. Elə bilirəm ki, bu sənət üçün dünyaya gəlmişəm”.
Orxan bədii oyma sənəti ilə özünün düzəltdiyi əl işlərini-qədim Bakını əks etdirən nümunələrini bizə göstərdi və arzularını bölüşdü: “Daha çox insan fiqurları üzərində işləməyi sevirəm. Gələcəkdə əl işlərimin beynəlxalq sərgilərdə nümayiş olunması da çox istəyirəm”.
Sevil Məmmədli isə rəsm və foto həvəskarıdır, mərkəzdə keçirilən bir sıra təlimlərin iştirakçısı olduğunu dedi: “Ən çox sevdiyim an üzərində işlədiyim əsər üzərində işi bitirib yeni əsərin eskizlərini hazırlamağa başlamaqdır. Öz yaradıcılıq məhsuluna baxmaq, ondan zövq almaq çox gözəl bir hissdir. Müxtəlif rənglərin istifadə olunduğu mövzularda rəsm çəkməyi çox sevirəm. Xüsusilə al-əlvan rənglərin istifadə olunduğu təbiət rəsmləri üzərində işləmək çox xoşuma gəlir”.
Fotoqrafiya sahəsində öyrəndiklərindən danışan Sevil bu sahədə ilk dərslərin ona çətin gəldiyini xatırladı, lakin sonralar yavaş-yavaş foto sənətinin sirlərinə yiyələndiyini dedi. O, öz çəkdiyi şəkilləri də bizə göstərdi.
DOST İnklüziv İnkişaf və Yaradıcılıq Mərkəzi artıq üçüncü ildir ki, müxtəlif sənətlərə yiyələnmək istəyən həssas kateqoriyaya məxsus olan gənclərə öz qapılarını açıb. Onlar hər gün burada təlimçilərdən seçdikləri sahə ilə bağlı yeni məlumatlar alır, sənətin sirlərinə yiyələnirlər. Öyrənmək, öyrətmək və yaratmaq çox savab və gərəkli işdir. Ona görə də sənət arzulu gənclərin böyük həvəslə üz tutduğu bu məkandan xoş hisslərlə ayrılırıq...